馬拉松練跑札記

昨天因為學校考試的原故,所以一早便回家,,,囝囝亦好早番到屋企,星魚見天氣幾好,下個月又要跑每年一度既渣打馬拉松,於是就靈機一觸,不如同個傻仔練下跑都好喎!於是就著他穿起跑步裝束,不過到最後,佢都著左長褲同長袖衫加一件小風褸,冇計!同佢講左架啦,佢都係咁堅持,不過最抵死既,係佢重要帶一大包紙紫菜去,大佬跑步喎,帶咁大包紫菜做物呀,不過最後我都好尊重佢(其實係唔理佢)尤得佢帶囉,條件係最後唔好要我攞就得啦!
在起步既初時,我原本諗住第一次練,算啦,由寶琳跑到坑口來回咪算囉,我就同佢講由佢選,一係就到坑口,一係就轉將軍澳一個圈去到調景嶺維景灣畔,點知個傻仔選左維景灣畔喎!我就同佢講成要跑成五公里,好遠架喎,電唔電架,佢話冇問題,好!!就咁,不過你唔好最後要我攞你d衫同包紫菜呀!
開始時,我就按著個計時表,計下要幾lor先跑完,昨日天氣好好,黃昏既時候,淺紅色既夕陽映照高空既白雲,顯得非常咁靚,重見到少有既空氣能見度tim,一路跑,一路欣賞,真係一大人生享受,個紫菜仔將包紫菜收係衫裏褲頭夾住,慌死佢跌落地,起初十幾米跑得好開心,之後就死下死下啦,嘩!長跑黎架,咁快做物呀,要慢d,注意呼吸,腳踭觸地先,之後他就跑得好d啦,斜陽映照到坑口既大厦,亦都好靚呀,真係感恩我可以出黎跑一跑呀^^跑坑口時,紫菜仔小奄痛,好正常者,頂下啦,跑多陣就冇事架啦,但佢已經放慢腳步,畢竟,佢都係第一次練者,好啦!慢d啦!佢一路叫痛一路跑,我同佢講:唔痛先話我知啦!跑到維景灣畔時,我地就休息了幾分鐘,他當然第一時間攞他的寶貝紫菜出黎補充體力啦,我就到ok店買我最喜愛既飲品寶礦力啦,當然我地大家都好大方,各自攞寶貝出黎一齊分享啦!呀,唔記得講,當時他已經將他的外衣連同紫菜給我代拿啦,真係俾佢激死!
休息完再起步,雖然他很累,但我說他已經一步比一步近屋企啦,快d踏步啦,冇幾lor,就跑番到寶琳呢!
時間係57分鐘五公里,第一次跑,幾好呀,完成到都好叻架啦,下次要快幾分鐘^^